Shkolla është vendi ku kalojmë një pjesë të madhe të rinisë sonë, por shpesh e harrojmë se ajo nuk është vetëm një ndërtesë ku mësojmë lëndë dhe marrim nota. Është hapësira ku formohet mënyra jonë e të menduarit, karakteri dhe qëndrimi ndaj botës.
Sot, më shumë se kurrë, roli i shkollave në përgatitjen e të rinjve për të ardhmen është vendimtar, sidomos në një qytet si Shkupi, ku ndryshimi ndodh çdo ditë, por jo gjithmonë reflektohet në sistemin arsimor.
Jetojmë në një kohë ku bota po ndryshon me shpejtësi. Teknologjia, rrjetet sociale dhe mënyrat e reja të komunikimit kanë krijuar një realitet ku njohuritë e fituara në libra nuk mjaftojnë më. Të rinjtë nuk kanë nevojë vetëm për informacione, por për aftësi për t’i përdorur ato, për të përdorur të menduarin kritik, për të zgjidhur probleme, për të bashkëpunuar dhe për të krijuar ide të reja.
Në shumë shkolla të mesme të Shkupit, nxënësit përballen me sfida që shkojnë përtej librave. Nga mungesa e kushteve, e pajisjeve moderne, deri te ngarkesa e lëndëve teorike që shpesh i largon nga motivimi. Këto janë sfida që ndikojnë drejtpërdrejt në mënyrën si të rinjtë e shohin arsimin, jo si një mundësi, por si një detyrim.
Fatkeqësisht, shumë shkolla ende funksionojnë me metoda të vjetra, ku fokusi është te mësimi përmendësh dhe jo te zhvillimi i mendimit të pavarur. Kjo bën që shumë të rinj të ndihen të papërgatitur kur përballen me sfidat e jetës reale. Është koha që arsimi të përshtatet me kohën, të përfshijë më shumë projekte praktike, diskutime dhe mënyra që nxisin kreativitetin dhe vetëbesimin.
Roli i profesorëve është po aq i rëndësishëm. Një profesor që frymëzon, që u jep nxënësve hapësirë për të pyetur, për të gabuar dhe për të mësuar nga gabimet, vlen më shumë se çdo libër. Shkolla nuk duhet të jetë thjesht një vend ku vlerësohemi për nota, por një hapësirë ku mësojmë të njohim veten dhe aftësitë tona.
Në fund, përgatitja për të ardhmen nuk nënkupton vetëm zgjedhjen e një profesioni, por ndërtimin e një qëndrimi ndaj jetës. Shkolla duhet të ndihmojë çdo të ri të kuptojë se suksesi nuk vjen vetëm nga dijet, por nga dëshira për të mësuar vazhdimisht dhe për të ecur përpara, edhe kur rruga është e vështirë.
E ardhmja e Shkupit varet nga sa mirë e përgatisim sot brezin që do ta udhëheqë nesër, nëse shkolla ndez dëshirën për të mësuar te të rinjtë, atëherë ka përmbushur misionin e saj më të madh.
